وفا ارزشی

جفا گورَن بولور عهد و وفانین ارزشینی

او کس که درده دوشوب بولدی جانین ارزشینی

او وقت که خوشدی ، یادیندان چیخیر که آلله وار

بولور گَلَنده یامان گون ، دعانین ارزشینی

جوانی کیمدی سایان ، صلح اولاندا کشورده ؟

اولاندا جنگ ، بولَلَّر جوانین ارزشینی

او ائو که وحدتی یوخ ، عاقبت خرابه اولار

ایتَر او کس ایتیریب کاروانین ارزشینی

محبت ائیله سه هر کیم سَنیله ، قدرین بول !

سارالدی گل که دانیب باغبانین ارزشینی

محصّل آه و فغان ائیلَر امتحان گئجه سی

بیر ایش گورَنده بولَر امتحانین ارزشینی

نه واردی دنیادا ، قدرین گَرَک بولاق هامیسین

آتار آنانی آتیب کیم آتانین ارزشینی

عُمُر بولود کیمی غفلت ده کئچدی ، دردا که

فقط بولوب گوجالان کس ، زمانین ارزشینی

او کس که ازبر ائدیبدور معین غزلّریوی

یقین که درک ائله ییب کیمیانین ارزشینی

 

برای مشاهده ی سایر اشعار ، کلیک کنید .

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *